ماوەیەکە (ی.ن.ک) هاوشانی قەیرانە سیاسیەکانی خودی ناوەوەی خۆی، رووبەرووی قەیرانێکی گەورەتر بووەتەوە سەبارەت بە دەرکەوتنی رووداوی کاری دزێوی تیرۆر و(تەسفیەی حیسابات )ی شەخسی وکۆنی ناوەخۆی برادەرو براکانی، کە بە ئاماژەو لەژێر چاودێری ئاستێکی بەرزو دیاری سەرکردایەتیەوە باسێ لێوە دەکرێت، ئەوانیش بێگومان دواجار هەر خۆیان بەرپسیاری یەکەم ودووەمیشن لەبەرئەوەی لەو قەوارە دیاریکراوەدا ئەوان خوادان کیان وچەقی بڕیارن نەک هێزێکی دیکە، هاوکات دوای ئەوەی هەمان ئەو هێزەی (ی.ن.ک) ماوەیەکە لە لایەن جەماوەرە سیاسیەکەی خۆیانەوە راستەوخۆو ناراستەوخۆ لەبەردەم دادگای سزای خەڵکەوە بەرپرسیارن ولێپێچینەوەیان لەگەلدا دەکرێت، لەبەرامبەر ئەو هەڵە مێژوویی وکارەساتانەی لە رابردوو ومێژوو ئەو هێزەدا ئەنجام دراوە..
دیسان ئەو سەرکردایەتیە سوود لە ئەزموونی هەڵەکانی وەرناگرێت وهەڵەی گەورەتر دەکاتەوە، ئەوەش لە کاتێکدا راستە ئەگەر ئەوان لەو هەولانە ومکوڕتر بن بە چاوپۆشێن وشاردنەوەو خۆڵ کردنە چاوی خەڵکی تاوانلێکراو، ئاشکرا نەکردنی بکوژانی شەهید(کاوە گەرمیانی)، دووبارە بوونەوەی هەمان هەڵەی پێشوو بۆ هێزێکی سیاسی وەکو (ی.ن.ک) رێخۆش دەکات، ئەوە کارەساتێکی گچکە نیە هەروەها زەنگێكی خەتەریشە ئەمڕۆکە بۆ خودی ئەو هێزەو خەڵکی کوردستان، ئەگەر (یەکێتی) تا زوو هەولی خۆرزگار کردنی خۆی نەدات لەو دەرفەتە بەرتەسکەیدا، ناتوانێت هاوسەنگیەکانی خۆی رێک بکاتەوە، ئەوەش تەنیا بە ساغ کردنەوەی بکەرانی ئەو دۆسیەو رادەستکردنی تاوانباران بۆ دەستی دادگایەکی دادپەروەر (هەرچەند ئەوەش کارێکی ئاسان)و دادگایەکی ئەوها دادپەروەریش لە کوردستاندا نیە، لەوانەیە (یەکێتی)بتوانێت ئەوکات تەرازووی گومان وراستیەکان بەلای خۆی رێک بخاتەوە..
دوێنێ لە رابردوودا (ی.ن.ک) خاوەنی مێژووێکی زیندوو بوو، چ لە خەباتی بۆ رزگاری و چ خەباتی رزگاریخوازانەی لە پێناوی ئازادی ودەنگی ئازادیخوازاندا، چۆن ئەو جەماوەرە شۆڕشگێڕو ئازادیخوازەی کە لە رابردوودا ئاگردانی بەرپا بوونی ئەو شۆڕشە بوون ئەوەیان پێ قبول دەکرێت کە خۆیان بێدەنگ بکەن لە ئاست ئەو تاوانانە، ئەو مێژووە بە روودان ودووبارە بوونەوەی ئەو هەڵانەوە جوغزێکی راست وچەپ بەسەر سەرجەم مێژووەکەیاندا دەکێشرێت، ئەو بەرپرسیاریە مێژووییە ئەگەر سەرکردایەتیەکەی جورئەتی ئەوەی نیە لە ئەستۆی خۆی بگرێت، ئەرکێکی رەوایە کە بنکە جەماوەریەکەی ئەو بەرپرسیاریە بگرنەخۆیان وخۆیان لە داهاتوویەکی بێگەرد نەدزنەوە، تا دوا خاڵی ئاشکرا کردن داکۆکی شۆڕشگێڕانەی خۆیان بۆ ئەنجام بدەن، با مێژووی رابردووی(ی.ن.ک) تا رادەیەک بە (موقەدەس)ی بمێنێتەوە، هەرچەندە من بۆ خۆم لەگەل ئەوەدا نیم هیچ شتێک تاسەر بتوانێت بە (موقەدەس)ی بمێنێتەوە..
لە کوردستانی بەر لە راپەرین خەسلەتی کوشتن وئازاردانی رۆژنامەنوسان ورۆشنبیرانی ئازادیخواز زۆر دەگمەن بوو، ئەگەر بەروارد بە بارودۆخی ئێستا بکەین، جگە لە (شاکر فەتاح) و(دڵشاد مەریوانی)و(عەبدولخالق مەعروف) کە لە لایەن رژێمی بەعس تیرۆر کران، ئەو خەسلەتە بەو شێوەیە بڕەوی نەدا بوو، بەڵام دوابەدوای راپەرین ئەوە دەبێتە دیاردەو دیاردەیەکی دزێوی بەرچاویش، ئەوەتا (د.عەبدولسەتار تاهیر شەریف)و(سۆرانی مامە حەمە)و (سەردەشت عوسمان)، هەروەها ئازاردانی کۆمەڵێک رۆژنامەنوس ورۆشنبیر کە لە بواری میدیاو چاڵاکوانی مەدەنیدا رۆڵی کاریگەریان هەبووە، تاوانیان لەبەرامبەردا ئەنجام دراوە کە لێرە نامەوێت ناوی یەکە یەکەیان دووبارە بکەمەوە..
بەڵام دووبارە بوونەوەی ئەو دیاردەیە لە چوارچێوەی زۆنی دەسەڵاتی (یەکێتی)، مەترسیەکانی سەر ئەو هێزە سیاسیە زیاتر دەکات وقەیرانەکانی گەورەتر دەکاتەوە، ئایا هەق وانیە سەرکردایەتی بۆ مانەوەو برەودانی بەرژەوەندیە شەخسیەکانی خۆیان نەک بەرژەوەندی حزبیان، کارێک بکەن تازووەو رێگاچارەیەک کە رێگەهەناسەدانێکی بەبەر ماوە بیر لەوە بکەنەوە، بەرلەوەی رەورەوەی مێژوو لە بەجێیان بێلێت وبکەونە دواوە ، ئەوکات هیچ کەسێک ناتوانێت بە هانایانەوە بچێت، هەروەها ئەو سەرکردانەی تۆزقاڵێک ویژدانی مرۆڤانەو هەستی ئازادیخوازانەیان تێدا ماوە ئەگەر لە بەرامبەر دۆسیەی (کاوە گەرمیانی) هیچیان بە دەست نیەو هیچیان پێ ناکرێت، هەق وانیە بۆ مێژوو دەستلەکار کێشانەوەی خۆیان جاڕ بدەن تا لەو بەرپرسیاریەتە پەرێزی خۆیان پاک بکەنەوە..
ئەوە مرۆڤە هەمیشە بە گوێرەی دەوربەرو بەرژەوەندیەکانی خۆی رەنگی دەگۆڕێت وهەر رۆژێک بە جۆرێک دەبێتە شتێک ورەنگێک، رۆژێک گورگەو رۆژێک چەقەڵە و رۆژێکیش شێرە لە قالبی مرۆڤەوە، ئەگینا گورگ وچەقەلەکان هەر لە پێستی خۆیانن نەگۆڕاون وناگۆڕێن، پێویستە لە کوردستان ودەرەوەی کوردستانیش دەنگی مرۆڤانەو ئازادیخوازانە شانبەشانی دەنگی رەوای ئازادیخوازان وچالکخوزانی مەدەنی ورۆژنامەنوسی ئازاد ورۆشنبیری ئازاد لەتەک هاوڵاتیان وجەماوەری پێشکەوتووخواز بێدەنگ نەبن لە دیزە بەدەرخۆنە کردنی کارکەرو بکەرانی ئەو فایلەی کاکە(کاوە)، ئەگینا ئاگرەکە ماڵی هەر هەموو کەسێک وهەر هەموومان دەگرێتەوە ئەگەر ئەمڕۆ هاوسێکانمان بێت وسبەی مالەکانی خۆشمان دەگرێتەوە..
هەق وایە هەر هەموومان لە ناوەوەو دەرەوەی کوردستان دەنگمان بەرز بکەین وبڕژێینە سەر جادەکان تا ئاشکرا بوونی تاوانباران بێدەنگ نەبین، تا دەسەڵات وبەرپرسیارەکانی کوردستان ئەوە بزانن دەبێت تا زووە کۆتایی بەو مەهزەلەیە سیاسیە بهێنن کە رۆژبەرۆژ لە گۆڕەپانی سیاسەتەی ئەوانەوە دووبارە دەبێتەوە، هەوەها تا دۆسیە کۆنەکان ئەوانەی لە پشت پەردەوە بێدەنگیان لێکراوە دێنەوە سەر مێزی لێدوان ولێپێچینەوە هەموو تاوانباران ریسواو دادگا بکرێن...

شوان عوسمان
هۆلەندە ٨/١٢/٢٠١٣