نزیک بە چوار مانگ پێش ئێستا، ئێمە کۆمەڵێک ئەکادیمیست‌و نوسەرو چالاکوان‌و ڕۆشنبیر لە کەمپینێکدا، وەک پیشاندانی هاوپشتیی‌و هاوسۆزیی بۆ هاوڵاتییانی ئێزدیی کە بە هۆی باوەڕی جیاوازیانەوە بەر دڕندانەترین فۆرمی تیرۆریزمی ئیسلامیی کەوتبوون، ڕامانگەیاند کە تا ئەو ڕۆژەی شنگال لە غەزوەی ئەو هێزانە رزگاری دەبێت‌و هاوڵاتییانی بەباوەڕ-ئێزیدی دەرفەتیان بۆ دەڕەخسێتەوە لە زێدی باووباپیرانی خۆیان پەیڕەوی ئاینەکەیان بکەن، ئێمە بە ڕەمزیی‌و بۆ ماوەیەکی کاتیی دەچینە سەر ئاینەکەیان.
ئێستا کە شنگال لەژێر دەستی ئەو هێزە دڕندانەیە رزگارکراوە، زەرورەتێک بۆ درێژەدان بەو فۆرمی ناڕەزایەتی نواندنەمان نەماوە، بۆیە لێرە کۆتایی پێدەهێنین.
بەڵێ ئەوە گۆڕانکارییەکی دڵخۆشکەرە کە ناوچەکانی ژیانکردنی هاوڵاتییانی ئێزدیی لەژێر دەستی گروپێکی فاشیست‌و پڕ لە ڕق‌و ڕاسیستی وەک گروپی داعش رزگاردەکرێن، بەڵام ئەوەی واچاکە ئێمە لەم کاتەدا جەختی لێبکەینەوە ئەوەیە کە نەهێڵین دڵخۆشبوون بەو گۆڕانکارییە ببێتە هۆی ئەوەی کۆمەڵگای کوردستان‌و دەسەڵاتبەدەستان وێنایەکی هەڵەی وایان لا دروست بێت‌و وابزانن دۆزی ئەو زیادەڕۆییانەی کە لە کۆمەڵگای ئێمەدا دژ بە هاوڵاتییانی ئێزدی ئەنجامدران‌و ئەنجامدەدرێن لێرەدا تەواو دەبێت‌و ئیتر پێوست بەوە نەماوە کاری لەسەر بکرێت.
دڵخۆشیی بە ڕزگاربوونی شنگال لە دەستی داعش نابێت ئەوەمان بیر بەرێتەوە کە دوو دۆزی دیکە ماون کە بۆ ئێمەی هاوڵاتییانی کوردستان‌و بۆ هاوڵاتییانی ئێزدیی زۆر گرنگن:
یەکەم: رزگارکردنی ئەو سەدان ژن‌و کچانەی کە لەلایەن ئەو پیاوە ڕیشن‌و تاوانکارانەوە کە حەزی سێکسیی کوێری کردون‌و هەموو عەقڵێک‌و هەموو هەستێکی ئینسانیی لێسەندونەتەوە، ڕفێنراون‌و وەک کۆیلەی سێکس ڕاگیراون.
دووەم: ڕێگرتن لەو هەموو رەگەزپەرستیی ‌و هاندان بۆ ڕقلێبوون‌و هاندان بۆ توندوتیژییە کە هەندێک حزبی ئیسلامیی‌و مەلای سەلەفیی‌و بانگخوازی ئایینی تا سەر ئێسقان ڕەگەزپەرست لە هەرێمی کوردستاندا بەسەر مینبەری مزگەوتەکانی حکومەتەوەو وەک ئەنجامدانی وەزیفەیەکی حکومیی، بەناوی ئیسلامەوە دژ بە هاوڵاتییانی ئێزدیی‌و ئایینەکەیان هەڵیدەڕێژن.
گرنگی ئەم خاڵە لەوەدایە کە ئەوە ئەو گوتاری ڕقەیە کە ئیسلامی سیاسیی‌و هەندێک پیاوانی ئایینی لە کوردستان لەم ساڵانەدا بە چڕیی دژ بە هەموو باوەڕو بیرکردنەوەیەکی جیاواز دەستیان داوەتێ. ئەمەش لە درێژەی خۆیدا هێزێکی ڕەشی وەک داعش بەرهەمدەهێنێت‌و شەرعییەت بە ڕەفتارە بەربەرییەکانی دەدات.
ئێمە کەمپینی ئاینگۆڕینی ڕەمزییمان لەپێناو دوو ئامانجدا بەڕێخست، بەڵام بینیمان کە سێ ئامانجی پێکا.
یەکەم، ئەو کەمپینە ئامانجی ئەوە بوو کە پەیامێک بۆ هاوڵاتییە ئێزیدییەکان‌ بنێرێت کە تێیدا هاودڵیی‌و پاڵپشتیی خۆمان پیشان بدەین.
دووەم، ئەو کەمپینە ئامانجی ئەوە بوو کە پەیامێک بۆ ڕێکخراوی دەوڵەتی ئیسلامیی، داعش، بنێرێت کە تێیدا پووچیی ئەو خەونەیان پیشان بدات کە دەیانەوێت لەڕێگەی ناچارکردنی ئێزیدییەکانەوە بە گۆڕینی ئایینیان بۆ ئیسلام، دەتوانن ئاییینی ئێزیدییەکان لەناو بەرن.
سێیەم، ئەوەی بۆ ئێمە تەواو جێگەی سەرنج بوو ئەو پەرچەکردارو ناڕەزایەتییە زۆرە بوو کە ئاینگۆڕینی ڕەمزیی بۆ سەر ئاینی ئێزدییی لەناو هەندێک لە پیاوانی ئایینیی‌و کادیرانی ئیسلامی سیاسیی‌و مەلای سەلەفی لە کوردستاندا دروستیکرد. ئاشکرابوونی ئەو کەسانە ئامانجێکی دیکە بوو کە خۆرسکانە کەمپینەکە پێکای.
بۆ ئێمە ئەوە مانای ئەوە بوو کە ئەگەر ڕاوەدوونانی ئێزدییەکان لە شنگال لەلایەن ڕێکخراوی دەوڵەتی ئیسلامییەوە لەئاکامی کەم لێبوردەیی بوو بۆ موسڵماننەبوون‌و بۆ ئێزدییبوون، ئەوا هەڵچوونی ژمارەیەکی زۆر لە پیاوانی ئاینیی‌و کادیرانی ئیسلامی سیاسیی لە کوردستان لەئاست فۆرمی ئەو کەمپینەی ئێمەدا، دەریخست کە لە کوردستانیشدا ئەو نالێبوردەییە داعشییە بۆ موسڵماننەبوون‌و بۆ ئێزدییبوون بەشێوەیەکی وا خەتەرناک ئامادەیە کە پێویست دەکات زووبەزوو کاری جیدییانەی لەسەر بکرێت.
ئەوەی گرنگ بوو بۆ ئێمە پیشانی هاوڵاتییانی کوردستانی بدەین کە بەلای ژمارەیەکی زۆر لە ئەکادیمیست‌و نوسەرو چالاکوان‌و ڕۆشنبیری کوردەوە، بەجنۆکەکردنی هاوڵاتییانی سەر بە ئایینی ئێزدی‌و وێناکردنیان وەک ئینسانی کەم بەهاتر لە موسڵمانان‌و وەک خەڵکێکی عەجیب‌و غەریب‌و پیس‌و بێزراو، قسەیەکی بێعەقڵانەی کۆمەڵێک پیاوی سەربە ئایدۆلۆجیایەکی فاشیستییە.
بۆ ئێمە بەتاڵکردنەوەی ئەو پروپاگەندانە‌و دروستکردنی پرسیار لەسەر ئەو دۆگمانەی لەناو ئەو ڕقڕێژییەی ئەو کەسانەدا هەیە کارێکی گرنگە بۆ وشککردنی ئەو سەرچاوەیەی کە داعش‌و داعشییەت ئاوی لێ دەخواتەوەو بەرهەمدێنێت.
کەمپینەکەی ئێمە لێرەدا تەواو دەبێت، بەڵام هیوادارین کارکردن بۆ دروستکردنی پرسیار لەسەر دۆگمەکان‌و وەستانەوە بە ڕووی چالاکیی ڕقڕێژیی لەناو کۆمەڵگای ئێمەدا هەر بەردەوام بێت‌و کاری جیدییانەی دیکە لەسەر بکرێت.

ڕێکخەرانی کەمپینی "بەشێوەیەکی ڕەمزیی‌و کاتیی دەبین بە ئێزدی"
٢١/١٢/٢٠١٤