پێش هەمووشت دەبێت ئەوە بڵێم: مێژوو پێماندەڵێت: ئەو چەندجارەی كوردانی (شەنگال) قەتلوعام كراون، هەموو جار بە هاوكاری و بە دەستی كورد قەتلوعامكراون، ئەمە راستیەكی زۆر سەخت و قورسە، بۆ ئێمەی كورد.
سەردەمی (سەلاحەدینی ئەیوبی) قەتلوعامێك كراون، سەردەمی (عوسمانییەكان) بەهاوكاری كورد قەتلوعامێك كراون و (پاشای كۆرە) قەتلوعامی كردون. ئەمجارەش بە هۆی بەجێ‌ هێشتنی كوردەوە، دیسانەوە قەتلوعامكران. یانی هەموو خولێك كە ئەم خەڵكەی ئاینەكەیان جیایە، كاتێك قەتلوعامكرابن، بەشێكی قەتلوعامەكەیان پەیوەندی بە كوردەوە بووە و كورد دەستێكی هەبووە لە قەتلوعامیان، كە ئەمەش خاڵێكی رەشە بەسەر مێژووی ئێمەی كوردەوە. وەلێ‌ ئەمە مێژووە و مێژووش وەك خۆی دەیگێڕێتەوە. بالەمە گەڕێین ئێمەی كورد چەند گوناهبارین لە دەستدەوردان بۆ وێرانكردنی ئەم كەمە ئایینە. با قسە لەسەر ئەوەبكەین، ئیدی بۆ بیرێك ناكرێتەوە تا خۆیان ئیدارەی خۆیان بكەن و خۆیان بڕیاربدەن سەر بە كوێ‌ بن؟
گوێگرتن لە میرەكانیان، گوێگرتن نیە لە خەڵكەكانیان. چونكە، میرەكانیان بە پێی بەرژەوەندی خۆیان قسە دەكەن و هەر لە میرەكانی ئێمە دەچن! خەڵكە بەدبەختەكە كوڕە گەنجەكانیان لە خوێندنگە دەهێننە دەرەوە و بەشارەكاندا بڵاوەیان پێدەكەن، تا ببن بە شاگرد و بە خزمەتكاری هوتێل و چێشتخانە و مەیخانەكان، تا شتێك بۆ ماڵەوە پەیدابكەن. كوڕی میرەكانیشیان لەگەڵ میرەكانی دیكە، سەرقاڵی خۆشگوزەرانی و خوێندنی باڵان لە خوێندنگە گەورەكانی رۆژئاوا، كتومت وەك بەرپرسە میرەكانی ئەم هەرێمە. ئەوەی ئەم كەیسە یەكلایی دەكاتەوە خەڵكەكە خۆیەتی. باشە بۆچی ماف بە خەڵك نەدرێت خۆیان بڕیار لەسەر ژیانی خۆیان بدەن؟ بۆ دەبێت میر و پیاوە حیزبیەكان بڕیار لەسەر چارەنووسیان بدەن؟
ئێمە ئیدارەی گەرمیانمان هەیە وەك نمونە، كە جۆرێكە لە ئیدارەی سەربەخۆ و كانتۆنێك بۆ خۆی. بۆچی بۆ گەرمیان پێمانخۆشە ئیدارەیەكی سەربەرخۆیان هەبێت و خۆیان كانتۆنی خۆیان بەرێوەببەن و سەر بەهەرێم بن، بۆچی بۆ (شەنگال) پێمانخۆشنیە؟ ئەم دوو فاقیە چیە لە دیدی حیزب و كەسی كوردیدا؟
چیدەبێت ئەگەر (شەنگال) وەك ئیدارەیەكی سەربەخۆ خاوەن كانتۆن و تایبەت مەندی خۆی بێت و سەر بەهەرێمی كوردستانبێت؟ ئەوەی بەرێز (دیمرتاش) دەیڵێت، كوفرێكی كوردی نیە دژی كورد، تێڕوانینێكی راستە بۆ (شەنگال). زۆرێك لە هاوڵاتیانی (ئێزیدی) گلەیی ئەوە دەكەن ئەوان دەیانەوێت خۆیان ئیدارەی خۆیان بكەن و نایانەوێت حیزبێك چارەنووسیان دیاری بكات و جارێكی دیكە چارەنووسیان بخاتە ژێر مەترسیەوە، كەچی لێرە حیزب بەناوی ئەوانەوە قسەدەكات. لە كاتێكدا ئەمریكایەكانیش كار بۆ ئەوە دەكەن هێزێكی تایبەت بەخۆیان دروستبكات بۆ بەرگریكردن لە خۆیان، راستیەكەی ئەمریكایەكان وەك ئەوەی (دیمرتاش) وتی كار بۆ دروستكردنی بازنەیەكی تایبەت دەكات بۆ (ئێزیدی) یەكانی ئەو ناوچەیە. ئەوەش خۆی لە چوار چێوەی كانتۆنێكدا دەبینێتەوە. ئەوەی بەم دۆخە تێكچوە حیزبی پارتیە! ئەگەرچی حیزبی پارتی بەهۆی هەڵهاتنی لە چوار داعش، جارێكی دیكە ئەو خەڵكەی خستەوە بەردەست قەتلوعام و فرۆشتنی خانمەكانیان، نیگەرانیشە كە ئەوان كانتۆنێكی تایبەت بەخۆیان هەبێت و ئیدارەی خۆیان بكەن! دەیەوێت هەرخۆی ئاراستەیان بكات و یەك دوو دەسەڵاتدار و میریان رازی بكات لە پێناو ئەودا قسە بكەن و هەزاران كەسیش بخاتە ژێر مەترسی و ژیانێكی سەختەوە! پێی وایە چوار خاوەن بەرژەوەندی لە پێناویدا قسە بكەن، واتای هەموو دەنگەكان دەگەیەنێت! لە كاتێكدا دڵنیام هەركاتێك بخرێتە ئاستی دەنگدانەوە، زۆرینەیان دەنگ بۆ كانتۆنێك دەدەن كە خۆیان ئیدارەی خۆیان بكەن. ناوچەكەشیان هێندە وێران و هەژارنیشینە لە ناوچەی سەدەكانی پێشودەچێت. بەجۆرێك پەراوێزخراون بە روخساری خەڵكەكەیدا دەزانیت لە چ دۆخێكدا دەژین.
نازانم حیزب بە چ مافێكیەوە دەیەوێت بڕیار دەری (ئێزیدی) یەكان بێت و بەناوی ئەوانەوە قسە بكات؟! لە كاتێكدا ئەوان هێشتا رێگایان پێنەدراوە خۆیان قسەی خۆیان بكەن. ئەگەر بریارە بڕوامان بە ئازادی هەبێت، با دوای دەركردنی دەوڵەتی ئیسلامی لە عێراق و شام، لە ناوچەكەیان، بدرێتە دەستخۆیان كە ئیدارەیەكی سەربەخۆیان هەبێت سەر بە هەرێم بێت، یان هەر وەك ئێستا بمێننەوە و حیزبێك دەسەڵاتی هەبێت بەسەریاندا. ئەگەر پێیانخۆشبێت وەك گەرمیان ئیدارەیەكی سەربەخۆ و كۆنتۆنێك بن لە هەرێم، با ئەو مافەیان پێبدرێت، ئەگەر دەشیانەوێت وەك ئێستا بمێننەوە با بمێننەوە. بەڵام، حیزب بۆی نیە بەناوی ئەوانەوە قسە بكات و توشی كارەساتیان بكات و رێگریش بێت لە بریاردانی ئەوان كە چیاندەوێت. ئەوانەشیان كە موڵكی حیزبن و بەناوی خەڵكەكەوە قسە دەكەن، شایەنی گوێلێگرتن نین، چونكە لە بەرژەوەندی خۆیانەوە قسە دەكەن، نەك لە بەرژەوەندی خەڵكەوە. ئێمە خۆمان بڕوامان بە (ریفراندۆم) هەیە بۆ جیابوونەوە لە (عێراق) ئەی بۆ ماف بەوان نەدەین لەناو خۆیاندا رێفراندۆم بكەن؟ كە كانتۆن و ئیدارەی خۆیان دەوێت، یان پێیانخۆشە وەك ئێستا بمێنەوە. ئیدی تاكەی؟ حیزب بەناوی خەڵكەوە قسە بكات و خەڵك بۆی نەبێت خۆی قسەبكات.


نەبەز گۆران