جاران کەسێکى تاوانبار لە دار ئەدرا،
ئێستا شارێکى بێ تاوان ئەکوژرێ
شارۆچکەیەکى بێگەرد هەڵئەواسرێ ..
جاران کەسێکى داوێن پیس..
دز ..
دوو زمان ، شار بەدەر ئەکرا ..
ئێستا میللەتێکى داوێن پاک ..
دەست پاک
دانسقە ، شار بەدەر ئەکرێ ..
جاران دەوڵەمەند کۆشکێکى هەبوو ،
لەگەڵ ئوتومبیلێ ..
ئێستا دەوڵەمەند چەندەها شارى هاوچەرخ و
هەزارەها ئوتومبیل و
کۆمپانیاى دوور و نزیک و
یەخت و
پاپۆڕ و
فڕۆکە و
دۆرگەى هەیە و
هێشتا ئەترسێ ،
لە برسا بمرێ ..
جاران هەژار ،
هەر ساڵێکى نەهات هەژار بوو ،
لەگەڵ باران ، تۆز و خۆڵى هەژاریى
لێ ئەبۆوە ..
ئێستا نە باران و نە دۆلار و نە نەوت ،
شێرپەنجەى هەژارییان پێ چارەسەر ناکرێ ..
ئەوەى توشى بوو ، ئەبێ بەو دەردەوە بمرێ ..
* * *
جاران من تەپکەیەک ..داوێکم لە حەوشەى خانووەکەمان
ئەنایەوە و
ئەڕۆیشتم ،
پاش چەند سەعاتێ بە تامەزرۆییەوە ئەگەڕامەوە ،
بۆ ئەوەى بزانم ئاخۆ
چۆلەکەیەک
ڕیشۆڵەیەک
کوکوختیەکیان بۆ گرتووم ..
ئێستایش ،
چەند کۆپلە شیعرێ فڕێ ئەدەمە فەیسبووکەوە و
چەند سەعاتێ بەجێیان دێڵم ،
جا بە تامەزرۆییەوە دێمەوە ،
بۆ ئەوەى بزانم ئاخۆ
چەند لایک و کۆمێنتیان بۆ ڕاو کردووم ..
( هیچ نەگۆڕاوم )

* * *
من نە سەرکردەم
نە شۆڕشگێڕ ..
موفتیش نیم ..
بەڵاًم پێم باشە هیچ کەسێ ئوتومبیلەکەى نەشوا ..
با بەتەواوەتى قوڕ دایپۆشێ ..
( بەڵکو بۆ چرکەیەکیش بێ ،
شەقام عەرەق بکاتەوە ..
قوڕ شەرمەزار بێ )
* * *
ئەو ڕۆژە زۆر خەفەتم خوارد ،
چونکە هێشتا باوکم نەبینیوە دوو هەنگاو ڕابکا ..
تراکسودێکى ئەدیداس بپۆشێ و
پێڵاوێکى نایک لە پێ بکا ..
* * *
ئەگەر ئاوێنە نەبووایە ،
سوێندم ئەخوارد هێشتا لە پۆلى سێى سەرەتاییم ..
هێشتا خەریکى پڕ کردنەوەى
مەتارەى ئاو و
قەڵەمى نووک و
بۆشاییم ..
* * *
زوڵمێکى زۆرم لە کچانى زانکۆ کرد
چوار ساڵم لەگەڵیاندا بەسەر برد و
بە یەکێکیانم نەووت :
خۆشم ئەوێى ...
* * *
مناڵەکانمان لە گەرما و
سەرما و
برسێتى و
تینوێتى پاراست ..
بەڵام نەمانتوانى بیانپارێزین لە تەنیایى ..
* * *
چۆلەکە بۆى نییە جۆرى خواردن هەڵبژێرێ ..
نانى بدەینێ نان ئەخوا ..
گەنم ، گەنم ..
برنج ، برنج ..
ئەگەر هیچیشى نەدەینێ ،
ئازادیى خۆى نادۆڕێنێ و
بە سەربەرزییەوە ئەڕوا ..