ئەمڕۆ ڕێکەوتى 23 ى دیسەمبەرى 2014 ڕۆیشتم بۆ وەرگرتنى مووچەى مناڵێکى کەمئەندام لە بنکەى دابەشکردنى مووچەى کەمئەندامان لە سلێمانى ، داخێک چووە دڵمەوە ، نەمزانى چۆن بگەمە ماڵەوە و چۆن کۆمپیوتەرەکەم بکەمەوە و چۆن ئەم وێنە تراژیدییە بۆ بەڕێزتان بگوێزمەوە ، هەڵبەت من هەر ئەوەندەم لە دەست دێ ، وەک پێغەمبەرانیش سڵاوى خوایان لێ بێ ، تەنها ڕاگەیاندنیان لەسەر بووە ، ئیتر جێ بە جێکردن ، بۆ لایەنى دەسەڵاتدار و جێ بە جێکار ئەگەڕێتەوە ..
ئەمڕۆ شەستە باران بوو ، ژمارەیەکى یەکجار زۆر لە کەمئەندامان و کەس و کارى کەمئەندامان ڕژابوونە ئەو مەڵبەندەى کە مووچەى تێدا دابەش ئەکرێ .. گۆڕەپانێکى خۆڵ ، یەک بست بنمیچى تێدا نییە ئەو خەڵکە داماوە لە گەرماى هاوین و .. باران و بەفرى زستان بپارێزێ .. ئەو خەڵکە تێکڕا لەبەردەم سەرما و سۆڵە و باراندا هەڵئەلەرزین .. ئینجا تەنها یەک پەنجەرە تەرخانکراوە بۆ ووردبینیى ، دوو سەرەى دوور و درێژى پیا و و ژن بە ڕاست و چەپى ئەو بستە پەنجەرەیەدا درێژ بوونەتەوە ، لە ژێر لێزمەى باران و سەرمادا ..کوێر و شەل و شەلەل دەماغ و کەڕ و مەنگۆل و بێ دەست و قاچ ، هەڵئەلەرزن و .. لە حاڵى مەرگدا ، زیاتر لە دوو سەعات لەناو قوڕ و چڵپاودا ، چاوەڕوانى بستە پەنجەرەیەک ئەکەن مۆرێک بدات لە پسووڵەى ژمێریارییەکەیان ..بە مەرجێک پێشتر لەبەردەم پەنجەرەیەکى تر سەعاتێکى تر وەستاوە و .. ناسنامە و سێ پەنجە مۆر و ناوونیشان و ژمارەى مۆبایلى لێ وەرگیراوە..
ئینجا دواى ئەو هەموو چاوەڕوانییە ، ئەبێ سەرەى ژوورى دابەشکردنى مووچە بگرێ ، واتە سێ جۆر سەرەگرتنى تاقەت پڕوکێن .. لە لایەکى ترەوە مەنهۆڵى موشتەمەلاتى فەرمانبەران گیراوە و .. بۆگەن و زێراب دێتە دەرەوە بە بەردەم ئەو خەڵکە نەخۆش و داماوەدا ، ئەڕوات ..
بەڕێز .. مرۆڤى کەمئەندام کەسێکە پێویستى بە یارمەتى و خزمەتگوزارییەکانە چونکە بەشێک یان زیاتر لە بەشێکى لەشى ئیش ناکات ، کەچى لەو مەڵبەندەدا هیچ خزمەتگوزارییەک بوونى نییە ، نە دەستشۆرێک .. نە کورسییەک بۆ دانیشتن .. نە ئاودەستخانەیەک .. نە یەک بست بنمیچ بۆ پاراستنیان لە هەتاوى هاوین و بارانى زستان .. نە تەنانەت چوار دیوار کە کۆیان بکاتەوە .. نا .. لە حەوشەیەکى قوڕ بە زستان و خۆڵ بە هاوین .. بنمیچەکەى ئاسمانە .. لەگەڵ زێرابى تەقیوى فەرمانبەرانى مەڵبەندەکەدا ..خۆ ئەگەر باسى گەرمکەرەوە و فێنککەرەوە بکەین ، ئەوا وەک ئەوە وایە لە سەردەمى ئەمەوییەکاندا باسى ئایفۆن و گالاکسى بکەین ، جۆرێکە لە مەحاڵ ..
بەڕێز وەزیرى کار و بارى کۆمەڵایەتى ، ئەگەر خەڵکانێکى کەمئەندام و داماو ، نەتوانن بپرسن ئەم حاڵە چییە ، ئەى بەڕێزتان نابێ جار بە جارێ سەردانى ئەو مەڵبەندانە بکەن بزانن چى ئەگوزەرێ ؟؟
باشە لەو هەموو بینا و تاوەر و مۆڵ و ساختمان و باڵەخانانەدا ، ئایا ناتوانرێ جێگەیەکى شیاو بۆ ئەو چین و توێژە نەخۆش و کەمئەندامە تەرخان بکرێ تاکو بە شێوەیەکى مرۆڤانە مووچەکەیان وەربگرن .. ؟؟
ئەوەیش بزانە لە هەموو جیهاندا باشترین خزمەتگوزارى و ڕێز و دڵدانەوە بۆ چین و توێژى کەمئەندام و کەمتواناکانە بە جۆرێک من هاوڕێیەکم هەیە بە هۆى کوڕێکى ئۆتیزمییەوە ، مافى پەنابەرێتى وەرگرتووە و .. هەموو کارئاسانى و ڕێزێکیان بۆ فەراهەم کردوون ، بە جۆرێک لەبەر خاترى ئەوان ئەسانسۆرێکى تایبەتیان بۆ باڵەخانەکەیان دامەزراندووە ..ئیتر بەو جۆرەیە ، هەڵبەت هێشتا لە سەدا پێنجى ئەو تراژیدیایەى کە ئەمڕۆ بینیم ، باسم نەکردووە ، چونکە بە ڕاستى نە ئەتوانم بیخەمە قاڵبى نووسینەوە و .. نە هیچ ووشەیەکیش ئەتوانێ وێناى بکات ..