نیگه‌رانی
له‌ باره‌ی چاره‌نووسم له‌ به‌هه‌شتدا
فازڵ عه‌ززاوی
و: نه ژاد عزیز سورمێ
 




ئه‌وه‌ی ئێستا زیاتر نیگه‌رانم ده‌كا،
كه‌ ژیانم
به‌ ڕاكردن
به‌دوای وه‌همدا له‌بێن برد،
سه‌راب دوای سه‌راب..
تا وه‌ناو ساڵان كه‌وتم..
كه‌ ببیه‌م،
كه‌سێ بێ له‌ ده‌رگام بدا
تاكو - بێ ویستی خۆم -
له‌ پاداشتی ڕه‌فتارباشیم له‌ دونیادا
له‌گه‌ڵ خۆیم بباته‌ به‌هه‌شت
تا فریشتان
له‌بن داران ببینم
به‌ ڕاست و چه‌پ ڕیز ده‌به‌ستن و
هوتاف به‌ناوی من لێ ده‌ده‌ن،
شاباش!
شاباش!
*
سه‌ربڵند،
وه‌ك تاووسی په‌ڕبڵاو
له‌سه‌رخۆ
به‌سه‌ر فه‌رشی سووردا ده‌ڕۆم
كه‌ به‌ دوور و درێژی ڕاخستراوه‌..
ده‌ف و ته‌پڵم بۆ لێده‌درێ
وێنه‌ی ڕاكه‌رێكی سه‌ركه‌وتووی
یارییه‌كانی ئۆلۆمپیش
ده‌روێشه‌ پیرۆزه‌كان،
له‌سه‌ر شانیانم داده‌نێن
به‌ره‌و دیجله‌یه‌ك له‌ مه‌ی و
فوراتێك له‌ هه‌نگوێنی شاخاوی
له‌وێ غیلمانان ده‌بینین
ده‌فری زێڕین ده‌هێنن،
تژی میوه‌ی هه‌مه‌جوور..
كه‌نیزه‌و حۆریش
له‌ فلیمێكی پیرۆزدا
بێ په‌رده‌،
مێینه‌تیانمان پێشان ده‌ده‌ن..
شاباش!
شاباش!
*
به‌ڵام من ڕازی نیم
هاوار ده‌كه‌م:
ئه‌من!
كه‌ ئه‌وه‌ش دوور و نزیك
له‌باره‌ی منه‌وه‌ ده‌یزانن،
وه‌ك هه‌موو حه‌كیم و عاقڵان
وێسكی سكۆتله‌ندیم،
له‌ مه‌ی پێ خۆشتره‌
وه‌ك هه‌میشه‌یش،
به‌بۆنی هه‌نگوێنی لینج
گێژ ده‌بم..
له‌وه‌ش زیاتر،
من به‌ڕاستی بێزار ده‌بم
هه‌موو كاتم به‌ سه‌رخۆشی
له‌ ئه‌به‌دییه‌تدا به‌سه‌ربه‌رم و
به‌ناو به‌هه‌شتێكدا بسووڕێمه‌وه‌
ته‌نانه‌ت ئه‌گه‌ر ده‌رگاكانی
له‌ زێڕو زوبه‌رجه‌دیش بێ
یا میوانه‌كانی
ئه‌و قه‌ددیسانه‌ بن
كه‌ هه‌ندێ جار
به‌سه‌ر ئاودا هاتبن و چووبن و
به‌ڕیشیان
ڕاوی شه‌یتانیان كردبێ ..
*
له‌ دوایدا،
گوێم لێیه‌ له‌ ده‌رگام ده‌ده‌ن
منیش هاوار ده‌كه‌م
له‌ كاتێكدا گه‌یشتووه‌ته‌ ئێسقانم
- چ ده‌كه‌م له‌ به‌هه‌شت؟
ببمه‌ براده‌ر!
بمبه‌ره‌ دۆزه‌خی گڕدار!
تا له‌وێ‌ به‌ به‌ختیاری و
به‌ كه‌رامه‌ت بژیم
ته‌نیا له‌وێ،
ده‌توانم ئه‌وه‌ی بنووسم
له‌و شیعرانه‌ی نه‌منووسیون
ناڕازی،
داوای خۆم،
دژ به‌ هه‌موو
كڵۆڵی و كوێره‌وه‌ری جیهان
عه‌رزی مه‌له‌كووتی هه‌ره‌ به‌رز بكه‌م..
شاباش!
شاباش!
-------------- له‌ سایتی گۆڤاری ( كیكا ) وه‌ كراوه‌ به‌ كوردی .

 

           

 

16/08/2016

 

goran@dengekan.com

 

dengekan@yahoo.com