ئەوەی زمانی نەبێ‌، نیشتمانی نیە، ئەوە نیشتمانی نەبێ‌، ئاسمانی نیە، ئەوەی ئاسمانی نەبێ‌، هەڵناكات، ناتوانێ‌ باڵبگرێت، ناتوانێ‌ بفڕێت. ئەگەر هەبێ‌ بپرسێت: مەگەر مرۆڤ لەواقیعدا ئەگەر خاوەنی ئەم شتانەبێ‌، دەتوانێ‌ باڵبگرێت، دەتوانێ‌ بفڕێت؟!
سوكرات لەپێناسەكردنی مرۆڤدا، دەڵێت: بێپەڕو باڵە. كەواتا فڕین بەمانا مەجازییەكەی، بەمانا فیكری و ماریفییەكەی، نەك بەمانا فیزیكییەكەی. ئەگەرنا لەواقیعدا، ئەوەی بێپەڕوباڵنافڕێ‌ باڵندەیە، مرۆڤ نییە، ئەوەی بیپَەڕوباڵناژی، مریشكە، مرۆڤ نییە، ئەوەی بێپەڕوباڵناخورێت و دەخورێت، پەلەوەرە، مرۆڤ نییە.
دەی ئەگەر مرۆڤ ئەو گیانەوەرە بێپەڕو باڵەیە لەواقیعدا، ئەو باڵلێدانەی لەچییە؟ هەیە لەمسەرەی دنیاوە دەفرێت بۆ ئەو سەری دنیا، هەیە لەفەزاو ژینگەیەكەوە بۆ فەزاو ژینگەیەكی دی، هەیە لەگردو تەپۆلكەو گوندێكەوە بۆ كەندو لەندو گوندێكی دی، هەموو ئەمانەو هەزارەها جۆرە فڕكە فڕك و فڕینی دی لەلایەك، ئەوەی بەدیاریكراوی جێگەی باسە لێرەدا مرۆڤی كوردە، لەناو كۆ مرۆڤی كوردیشدا، مرۆڤە حزبییەكەی، هەیە لەحزبێكەوە بۆ حزبێكی دی، هەیشە لەناو یەك حزبدا فڕكە فڕكیەتی، ئەگەر مانا مەجازی و، فیكری و، ئایدیۆلۆژی و ماریفییەكەی وەربگرین، دەشێت ئەمە بۆ ئەندام و لایەنگرو كادرانی حزبێك ئاسایی و، ڕەوایەتی وەك ماف و ئازادی تێدابێ‌، دیارە ئەویش بەمانا بابەتی و مۆڕاڵیەكەی، بەڵام باڵلێدان و باڵباڵین لەناو یەك فەزاو مەنهەجی حزبیدا، یانی چی، بۆ چییە، ڕەوایەتییەكەی لەچیدایە، یەكێتیی نیشتمانیی كوردستان، وەك نمونە:
یەكێتییەكان، خاوەن یەك زمانی دیاریكراوی سەربەخۆن، وەك گوتاری ئایدیولۆژی، خاوەن یەك جوگرافیایی دیاریكراوی سەربەخۆن، وەك پێكهاتەی ئۆرگانیكی، خاوەن یەك فەزای سیاسی سەربەخۆن، وەك وەحدەی تەنزیمی، ئەدی ئەوە چییە بەناوی باڵباڵێنەوە، هەموو ڕۆژێكی حەشرەو جەهەندەمیانە جەستەی ئەو حزبە داغاندەكاو، وەك مۆرانە مۆخی ئەو حزبە دەخوات؟! ڕەوایەتییەكەی لەچییەوە وەردەگرێت؟! لەفیكرو فەلسەفەو ئایدیۆلۆژیتەكەی، یان لەپێڕۆ پڕۆگرامە ناوخۆییەكەی؟!
هەر بەڕاست ئەوەی زۆر جار دەگوترێت: ئەوەی ڕودەدا لەیەكێتییدا، كۆنەو، نوێ‌ نیەو، نیشانەی هەبوونی ئازادی و، باوەڕ بوون بەجیاوازییە، وایە لەحەقیقەتدا؟! ئەگەر وایە كوا لەكوێی ئەو حزبەدا باڵباڵن و ڕاگەیاندنی ئۆرگانی تایبەت بەو بابەتە، ڕێگەپێدراوە؟! ئەرێ‌ وەك ئەوەی دەگوترێ ئەمە فرییە لەمینبەردا؟! ئەگەر وایە كوا كامانەن ئەو مینبەرە ڕەوایەتیپێدراو ڕێگەپێدراوانە؟!
لەڕاستیدا ئەم پرسیارانە وەختێك ڕاست و بەبەڵێبوون وڵامەكانیان نەك ئێستا، وەختێك بەو مانایە نا، لەئێستادا " ی.ن.ك " حزب و هێزێك بێ‌ تەنگ و تاریك و تۆتالیتاری، نەخێر بەپێچەوانەوە، یەكێتیی لەكوێ‌ بێت ئازادی لەوێیە. یەكێتیی لەئازادیدا لەدایك نەبووە، هەتا بێباك بێت بەرامبەر بەلەبارچوون و لەچوارچێوەدان و پێشلێكردنی ئازادی، یەكێتیی بۆ ئازادی، بۆ هێنانە ئاراوەی ئازادی لەدایكبووە، بەڵكە بەمانای ئەوەی باڵباڵێنەكەی ئەمڕۆی، ڕەوایەتیەكەی بەبەڵێ‌ لەڕابردوی بەر لەكۆنگرەی یەكدایە، نەك لەئێستایدا، لەو كاتەدایە، یەكێتیی بەكردەوە هەڵگری فرە مینبەری بوو، هێڵی گشتی " هێڵە پانەكە "، كۆمەڵەی ڕەنجدەران، بزوتنەوەی سۆسیالیستی، وەك سێ‌ بزواوتی جیاوازی هەڵگری فەلسەفەو دنیابینی جیاواز ئەمما نزیك لەیەكترییەوەی تیادا ئەندام بوون، چونكە هەر یەك لەم باڵانە، وێڕای هەبوونی پێڕۆ پڕۆگرامی ناوخۆی یەكێتیی، لەیەككاتدا خاوەنی پێڕۆ پڕۆگرامی ناوخۆیی رێكخراوەی تایبەت بەخۆیان بوون، یانی لەو كاتەوەی ئەمانە حەقیقەت و، ڕێگەپێدراو بوون، بەڵام ئایا لەئێستادا وەها فریەییەك لەباڵباڵێندا، ڕێگەپێدراو، پڕۆگرامكراو، فیكرو فەلسەفەو ئایدیۆلۆژیاو چوارچێوە دیار، ڕەواو رێگەپێدراون؟ بێگومان نەخێر..
دەی كەواتا مەسەلە چییە، ئەوە چییە دەگوزەرێت؟ وڵامەكەی دیارە، پێویست بەڕونكردنەوە ناكات، لەدوای كونگرەی یەكەوە، هەرگیز بەدیناكەی یەكێتییەكی تاسەرو بابەتی لەهیچ بەناو باڵێكدا هەبووبێ، ناوە ناوە گۆڕانكاری بەسەر پێكهاتەكانیاندا هاتووە، یانی لەكوێ بەرژەوەندییە خودییەكان گۆڕانكاری بەسەردا هاتبێ، لەوێ پێكهاتەی باڵەكانیش گۆڕاون، ئەمەش نیشانەی ئەوەیە ئەو باڵانە هەرگیز هەڵگری فكرو خەمی یەكێتیی نەبوون، باڵی بەرژەوەندی و بەڵا بوون، هەروەك چۆن بەشێكی هەڵاتن بووە لەبەرپرسیارێتی، چونكە دەبینێت توانستەكانی بەبنبەست گەیشتوون لەئاست قۆناغەكەدا، بەشێكیش كاتێ دەبینێت بەرژەوەندییە خودییەكانی كەوتوونەتە ژێر پرسیارو مەترسییەوە، لەكاتێكدا سەركردە ئەگەر سەری كردە بێت بەمانای وشە، دەبێ‌ هیهەتا ئەوسەر بێت، نەك نیوەی ڕێ‌ و، نیوەی جێ‌ و، نیوەی بەش و پشك، بەشێكی تریش فەلسەفەی نانە لەئاژاوەو شڵەژاندا، هەروەها هەشە بۆ شوێنەونكردنی خۆبەدەستەوەدانیشە لەدەرەوەی" ی.ن.ك "دا.
لەبەر ئەوە چارەسەر، دروستكردنی هاوسەنگی نییە لەباڵباڵێندا، تەسفییەكردنی باڵباڵێنە لەیەكێتییدا. چونكە خودی دروستكردنی هاوسەنگی ڕەوایەتیدانە بەناڕەواییی، چارەسەر، یەك تیمى و یەك سەركردایەتیكردن و، دژە باڵییە، دەستگرتنە بەسیاسەتی چەپكە گوڵەكەی " مام جەلال "ـەوە لەئەداو لەهێنانە ئاراوەی ئەلتەرناتیڤی نوێ‌ وەك هزی هاوچەرخ بۆ بەڕێوەبردنی " ی.ن.ك " نەك پەرت و پەرێشانكردنی.